Адвокатите на Доналд Трамп побараа да се одложи пресудата на поранешниот американски претседател за фалсификување финансиски податоци, која беше закажана за јули, јавуваат американските медиуми.
Тие ја наведоа најновата одлука на Врховниот суд со која на поранешниот претседател му се дава имунитет од гонење за службени дејствија што ги направил додека бил претседател на САД.
Во мај, Трамп беше прогласен за виновен по 34 точки од обвинението за фалсификување деловни информации, особено затоа што и плати на порно актерката Сторми Даниелс да молчи за нивната наводна афера.
Изрекувањето на пресудата е закажано за 11 јули.
Според пресудата, тој ги потпишал финансиските извештаи за кои му се судеше додека беше претседател во 2017 година, што според неговите адвокати треба да се земе предвид.
Минатата година адвокатите на Трамп тврдеа дека обвиненијата во случајот се однесуваат на службени дејствија во рамките на неговите претседателски должности.
Сепак, федерален судија напиша дека Трамп не успеал да докаже дека неговите постапки биле „условени или поврзани со каква било акција преземена од претседателот во врска со неговите службени должности“.
Трамп ја нарече одлуката на Врховниот суд од понеделникот „голема победа“ за демократијата.
Во пресудата се наведува дека претседателот има имунитет за „службени дела“, но не и за „неслужбени“.
Пресудата се однесува на вториот судски спор против Трамп, во кој тој е обвинет за незаконски обид да ги оспори резултатите од претседателските избори во 2020 година, на кои победи Џозеф Бајден.
Трамп и во овој случај негираше вина.
Реагирајќи на одлуката на Врховниот суд, Бајден рече дека тоа е „опасен преседан“ што го поткопува „владеењето на правото“ во Америка.
Во поднесокот до њујоршкиот судија Хуан Меркан, адвокатите на Трамп наведуваат дека последната одлука на Врховниот суд го потврдува ставот на одбраната дека на обвинителството не требало да му се дозволи да презентира одредени докази во овој случај, бидејќи тие се дел од официјалните претседателски дејствија.
Во мај, 12 поротници на Менхетен едногласно го прогласија Трамп за виновен по сите точки од обвинението за фалсификување деловни извештаи.
За време на судењето беа сослушани голем број сведоци, меѓу кои и Сторми Даниелс, поранешна ѕвезда на филмови за возрасни.
Во центарот на овој случај била наводната сексуална афера, која поранешниот претседател ја имала со неа.
Поранешниот претседател беше обвинет за прикривање на плаќањата за купување на молкот на Сторми Даниелс за време на последните денови од изборната кампања во 2016 година.
Обвинителите тврдеа дека со евидентирањето на оваа исплата како правни такси, Трамп ги прекршил законите за финансирање на кампањата.
Трамп ја нарече пресудата „срамна“.