Поранешниот американски претседател Доналд Трамп поднесе барање до Врховниот суд на САД, барајќи имунитет од гонење за обидот да го поништи неговиот изборен пораз во 2020 година, а случајот треба да се најде пред судот следниот месец.
Трамп ја обжали одлуката на понискиот суд кој одби да го заштити од кривичната постапка водена од специјалниот обвинител Џек Смит, бидејќи тој беше претседател кога преземаше дејствија со цел да ја поништи изборната победа на Џо Бајден.
Поднесокот содржи аргументи слични на оние што адвокатите на Трамп претходно ги дадоа во обид да го заштитат од гонење и ги повторува изјавите што Трамп ги дал за време на кампањата, пренесува Хина.
„Претседателот не може да функционира, а самото претседателство не може да ја задржи својата независност доколку претседателот се соочи со кривично гонење за службени дејствија по напуштањето на функцијата“, се наведува во поднесокот.
Трамп, првиот поранешен претседател кој се соочува со кривично гонење, е републиканскиот кандидат на претседателските избори на 5 ноември, каде што ќе се соочи со демократскиот претседател Џо Бајден.