Републиканскиот кандидат Доналд Трамп изјави дека актуелниот претседател Џо Бајден се откажува од претседателската трка по лошиот настап во минатонеделната дебата на Си-Ен-Ен.
Трамп го изрази своето мислење во видеото што го сподели на својата социјална мрежа Truth Social.
На видеото тој седи во кола за голф и разговара со одредена личност.
Настапот на Бајден во дебатата беше широко критикуван и доведе до зголемена загриженост за неговото здравје и повици тој да се откаже од изборите во ноември.
„Тој штотуку испадна, знаете, тој се откажува од трката, а тоа значи дека ја имаме Камала“, рече Трамп, мислејќи на потпретседателката Камала Харис.
„Мислев дека ќе биде подобра. Таа е толку мизерна, таа е толку е*ено лоша. Можете ли да замислите да се занимавате со Путин и претседателот на Кина – кој е тежок човек, тој е тежок човек, многу тврд човек. Само што објавија дека тој (Бајден) веројатно се откажува“, додава Трамп, пренесува Sky News.
Белата куќа ги отфрли написите на одредени медиуми
Не е јасно која е основата за тврдењата на Трамп, имајќи предвид дека 81-годишниот Бајден недвосмислено ги отфрли шпекулациите дека се повлекува од трката.
„Не заминувам. Во оваа трка сум до крај“, им порача Бајден на своите поддржувачи.
Бројките на Бајден во анкетите паднаа, а американските медиуми објавија дека тој му рекол на сојузникот дека неговите настапи следната недела се клучни, што Белата куќа го негираше.
Бајден во вторникот призна дека речиси заспал за време на ТВ дебатата поради џет-лаг.
Номинацијата на Бајден треба официјално да биде потврдена на партиската конвенција во август, а единствениот реален начин тој да биде сменет е ако тој самиот одлучи да поднесе оставка.
Доколку се откаже, потенцијалните замени ги вклучуваат Камала Харис, гувернерот на Калифорнија, Гевин Њусом и гувернерот на Мичиген, Гретчен Витмер.
Бајден утре дава интервју
Вчера Бајден одржа виртуелен состанок со 24 гувернери за да се обиде да ги убеди дека е до претседателската функција.
Гувернерите на Мериленд, Минесота и Њујорк им изјавија на новинарите потоа дека сè уште го поддржуваат.
Сепак, неколку демократи јавно се огласија и го повикаа да се повлече, вклучувајќи ги и пратениците Раул Гријалва од Аризона и Сет Мултон од Масачусетс.
„Несреќната реалност е дека статус кво веројатно ќе ни го донесе Трамп. Претседателот Бајден нема да стане помлад“, предупреди Мултон.
Ко-основачот на Нетфликс и голем донатор на партија, Рид Хестингс, исто така, го повика Бајден да се откаже од трката, а притисокот врз Бајден може да стане неподнослив доколку повеќе големи донатори го сторат истото.
Сите очи сега се насочени кон утрешното појавување на претседателот во интервју за ABC News.