Олег Тинков е еден од 11-те исклучително богати Руси кои го загубија статусот на милијардер по падот на руската берза и рубљата по инвазијата на Путин на Украина.
Тинков стана еден од најбогатите луѓе во Русија кога ја позиционираше својата дигитална банка Тинкоф на лондонската берза по бизнисот со продажба на пиво и кнедли.
Но, по нападот на Украина, акциите на Тинкоф набрзо паднаа за повеќе од 90 отсто. Рускиот банкар изгуби повеќе од 5 милијарди долари за помалку од еден месец, а вчера и статусот на милијардер.
Така, тој се рангираше меѓу најмалку 10 поранешни руски богаташи кои отпаднаа од клубот на милијардери поради падот на руските акции и рекордно ниската вредност на рубљата во однос на доларот, а сето тоа поради санкциите што Западот ги воведе кон Русија.
Тој сега има околу 800 милиони долари
Форбс проценува дека нето вредноста на Тинков сега падна на околу 800 милиони долари бидејќи значителен дел од неговото богатство е врзан за Tinkoff Bank, чија пазарна вредност падна од највисоко ниво од 23 милијарди долари во ноември на нешто повеќе од 1 милијарда долари во вторник.
Имено, Московската берза беше затворена трет ден по ред. Берзата воопшто не се отвори оваа недела откако Западот воведе строги санкции, што доведе до рекордно ниски нивоа на руската рубља и остар скок на каматните стапки.
За тоа време, Tinkoff Bank и другите руски компании доживеаа голем пад на цените на акциите.
Акциите на Лукоил, најголемиот независен руски производител на нафта, основан од милијардерот Вагит Алекперов, исто така паднаа за речиси 93%.