Портпаролот на Министерството за надворешни работи на Иран, Есмаил Багеи, денес изјави дека Иран ќе го смета секој напад врз своја територија, вклучително и ограничените напади, како „чин на агресија“.
Американскиот претседател Доналд Трамп претходно изјави, во врска со преговорите со претставниците на Иран за ограничување на нуклеарната програма на земјата, дека се надева дека ќе се постигне дипломатско решение, но дека не ја исклучува употребата на воена сила.
Багеи, исто така, на прес-конференција во Техеран изјави дека поморските и воздухопловните сили на земјите од Европската Унија се означени како терористички врз основа на одлуката на Врховниот совет за национална безбедност и во согласност со законот усвоен од иранскиот парламент, пренесува ИРНА.
Тој додаде дека според оваа ознака, вооружените сили на ЕУ што дејствуваат во областите околу Персискиот Залив се сметаат за терористички субјекти и дека одлуката ќе има соодветни последици.
Багеи рече дека мерката е усвоена како одговор на одлуката на Европската Унија да ја стави Исламската револуционерна гарда (ИРГЦ) на својата листа на терористички организации, и покрај фактот дека ИРГЦ е официјална гранка на иранските вооружени сили, пренесува Танјуг.