Јапонскиот парламент денес повторно ја избра Санае Такаичи за премиер на Јапонија, по убедливата победа на нејзината Либерално-демократска партија на вонредните парламентарни избори на 8 февруари.
Пред почетокот на седницата на јапонскиот парламент, кабинетот на Санае Такаичи поднесе колективна оставка во согласност со Уставот, по што таа беше потврдена за премиер на седница на Претставничкиот дом, долниот дом на парламентот.
Според јапонската новинска агенција Кјодо, се очекува Такаичи да го претстави новиот кабинет во текот на денот.
Сите министри од нејзината прва влада, формирана откако таа го презеде раководството на Либерално-демократската партија (ЛДП) во октомври, треба да ги задржат своите позиции, вклучувајќи го министерот за надворешни работи, министерот за финансии и министерот за одбрана.
Вечерва, според медиумските извештаи, Такаичи треба да одржи прес-конференција на која ќе презентира, како што беше најавено, „одговорна, но решителна“ фискална политика, вклучително и план за двегодишно суспендирање на данокот на потрошувачка на прехранбени производи, што ЛДП го вети за време на изборната кампања.
Ветеранот од ЛДП и поранешен министер за правда, Еисуке Мори, беше избран за претседател на Претставничкиот дом, додека Кеичи Иши од главната опозициска Алијанса за центристички реформи (CRA) беше назначен за потпретседател.
На изборите, ЛДП освои рекордни 316 од вкупно 465 парламентарни места во Долниот дом, во споредба со 198 што ги имаше пред изборите, што е прв пат по Втората светска војна една партија да добие двотретинско мнозинство во тој дом, објаснува Кјодо.
Такаичи распиша предвремени избори со распуштање на Претставничкиот дом на 23 јануари, на почетокот на редовната седница, обидувајќи се да ја искористи високата поддршка на владата и да ја зајакне позицијата на владејачкиот блок, кој ги вклучува ЛДП и Јапонската иновативна партија (JIP), позната како Нипон Ишин.
Резултатот од изборите е силен поттик за Такаичи и нејзината програма, која вклучува експанзивни фискални мерки и подготвеност да работи на измена на пацифистичкиот Устав, долгогодишна цел на ЛДП, според Кјодо.
Сепак, уставните измени бараат поддршка од две третини во двата дома на парламентот, како и потврда на референдум.