Светската здравствена организација (СЗО) предупреди дека Кина може да се соочи со „многу тежок период“ поради можен бран на инфекции, една недела откако почна да ја релаксира политиката на „нулта толеранција“ за Ковид-19.
Кинеските државни медиуми известуваат за тешко болни пациенти во болниците во Пекинг.
– Секогаш е многу тешко за која било земја да излезе од ситуација во која имаше многу строги контроли, изјави вчера портпаролката на СЗО Маргарет Харис на прес-конференција во Женева, пренесува Ројтерс.
Кинеската Национална здравствена комисија (NHC) од среда ќе престане да известува за нови асимптоматски инфекции бидејќи повеќе не се спроведува масовно тестирање, што го отежнува прецизното пресметување на вкупниот број пациенти, се вели во соопштението на институцијата.
Тие додаваат дека ревакцинацијата против коронавирусот ќе биде овозможена за високоризичните групи и лица над 60 години.
Временскиот јаз меѓу првата и втората дополнителна вакцина ќе биде шест месеци, соопшти НХЦ и додаде дека лицата кои можат да бидат високоризични групи ќе ги вклучуваат оние со тешки постоечки болести и оние со низок имунитет.