Бројот на случаи на маларија во 2023 година е зголемен за 11 милиони во однос на претходната година. Минатата година имаше 597.000 смртни случаи од маларија, слично ниво како и претходната година, а најголем дел од смртните случаи се деца и бремени жени во Африка, соопшти СЗО, пренесе Ројтерс.
„Никој не треба да умре од маларија, но болеста продолжува да ги погодува луѓето во Африка, особено малите деца и бремените жени“, изјави генералниот директор на СЗО, Тедрос Гебрејесус.
Бројот на случаи на маларија и смртни случаи значително се намали меѓу 2000 и 2015 година, но нагло зголемување на смртноста се случи за време на пандемијата на коронавирус.
Иако бројот на заболени се зголемува со зголемувањето на популацијата, стапката на зараза е сè уште загрижувачка, оценува СЗО.
Во 2015 година на секои 1.000 загрозени лица имало 58 случаи на маларија, додека во 2023 година тој број се зголемил на 60, пренесува Танјуг.
Иако постојат нови методи во борбата против маларијата, вклучувајќи две вакцини и нови мрежи против комарци, СЗО посочува дека климатските промени, војните, отпорноста на лекови и инсектициди, како и недостатокот на финансиски средства, претставуваат сериозен предизвик во борба против оваа болест.
Во 2023 година, 4 милијарди долари беа достапни за борба против маларијата, додека СЗО процени дека се потребни 8,3 милијарди долари.