Околу 60 светски лидери ќе се соберат овој викенд во Минхен на традиционалната безбедносна конференција, во време на напнати односи меѓу западните сојузници и американскиот претседател Доналд Трамп и се погласни повици за стратешка автономија на Европа во однос на нејзиниот трансатлантски партнер.
Бомбастичниот говор на американскиот потпретседател Џеј-Ди Венс, кој минатата година ги обвини европските земји за задушување на демократијата и уживање во масовна миграција, сè уште одекнува во главниот град на Баварија, најавувајќи пукнатини во традиционалниот сојуз меѓу Европа и Америка.
Тонот на овогодинешниот собир го постави минатонеделниот годишен извештај на организаторите, во кој Трамп е обвинет дека со својата „деструктивна политика“ го уништил просперитетниот меѓународен поредок воспоставен по Втората светска војна.
Најголемата криза во НАТО од неговото основање во 1949 година неодамна беше предизвикана од заканата на Трамп да воведе царини за европските земји кои се противат на САД да ја преземат контролата врз Гренланд, автономна територија на Данска, сојузник во Организацијата на Северноатлантскиот договор, за заштита на нејзината национална безбедност.
Трамп подоцна ги повлече заканите и ја отфрли можноста за воено освојување на најголемиот остров во светот.
Американската администрација годинава ќе ја претставува државниот секретар Марко Рубио, кој важи за нешто поумерен политичар од Венс, но и за лојален извршител на политиката на Трамп „Америка на прво место“.
Кога во петок ќе почнат првите говори во добро етаблираниот хотел Бајеришер Хоф, се очекува Европејците да се обидат да покажат дека се подготвени да ја намалат зависноста од американскиот безбедносен чадор, но истовремено да го потсетат Вашингтон дека старите сојузи можат да им служат на интересите на САД.