Британскиот премиер Риши Сунак денеска изјави дека ќе присуствува на самитот COP 27 следната недела во Египет, со што ќе ја смени својата првична одлука да не присуствува на годишната конференција на ОН за климатски промени за решавање на итни економски прашања.
Сунак на Твитер напиша дека нема долгорочен развој без вклучување во спречување на климатските промени и дека нема енергетска безбедност без инвестирање во обновливи извори на енергија, објави Ројтерс.
Сунак рече дека ќе присуствува на самитот COP 27 за да продолжат да се спроведуваат заклучоците од минатогодишниот самит COP 26 во Глазгов со цел безбедна и одржлива иднина.
Британскиот премиер беше критикуван од активисти за климата, опозициски политичари и некои членови на неговата Конзервативна партија, откако неговата канцеларија минатата недела објави дека Сунак нема да присуствува на COP 27 за да се фокусира на подготовката на фискалниот извештај што треба да биде објавен на 17 ноември.