Федерален судија во Бостон денес нареди поништување на одлуката на администрацијата на американскиот претседател Доналд Трамп за драстично намалување на финансирањето за истражувачки грантови на Универзитетот Харвард. Тоа намалување изнесуваше повеќе од 2,6 милијарди долари.
Федералната окружна судијка Алисон Бароуз застана на страната на универзитетот, пресудувајќи дека намалувањата се незаконска одмазда за одбивањето на Харвард да ги исполни барањата на Белата куќа за промена на универзитетските политики.
Пресудата претставува значајна победа за Харвард во спорот со администрацијата на Трамп, која се обиде да го спречи овој престижен универзитет да прифаќа странски студенти и се закани дека ќе ги укине даночните кредити.
Доколку одлуката остане, Харвард би можел да ги врати своите широки истражувачки активности и стотици проекти кои останаа без федерално финансирање.
Во тужбата, Харвард ја обвини администрацијата на Трамп за кампања на одмазда откако универзитетот, во писмо од 11 април, отфрли серија барања од федерална работна група за антисемитизам.
Барајќи сеопфатни промени во врска со протестите на кампусот, академските програми и приемот на студенти, писмото имаше за цел да одговори на обвинувањата од властите дека Универзитетот станал жариште на либерализмот и толерирал антиеврејски дејствија на кампусот.
Претседателот на Харвард, Алан Гарбер, вети дека ќе се бори против антисемитизмот, но нагласи дека ниедна влада „не треба да диктира што можат да предаваат приватните универзитети, кого можат да примат и вработат и кои области на студии и истражување можат да ги следат“.