Генералниот секретар на НАТО Јенс Столтенберг денеска им се обрати на делегатите на 18-та годишна Конференција на НАТО за контрола на вооружувањето, разоружувањето и неширење на оружјето за масовно уништување и посочи дека човештвото влезе во период на огромни безбедносни предизвици.
– Официјален Кремљ одлучи да ја укине контролата на оружјето и да ја поткопа стратешката стабилност со суспендирање на учеството во Новиот договор СТАРТ, непочитување на Договорот за нуклеарни сили со среден дострел (ИНФ) со се поизразена провокативна нуклеарна реторика и закани за распоредување тактичко нуклеарно оружје во Белорусија. Ова се неодговорни дејствија, дизајнирани да ги одвратат сојузниците од НАТО да ја поддржат Украина, но неуспешни – изјави Сртолтенберг, а пренесена е на веб-страницата на НАТО.
Столтенберг рече дека се очекува Кина да има околу 1.500 нуклеарни боеви глави до 2035 година.
„Мораме да го прилагодиме нашиот пристап“
– Долгорочно мораме да размислиме и да го прилагодиме нашиот пристап кон поопасен и попредизвикувачки свет. Како глобална сила, Кина има глобални одговорности. Пекинг би имал корист и од зголемената транспарентност, предвидливост и безбедност на договорот за контрола на вооружувањето – рече Столтенберг и порача дека НАТО е платформа за соработка со Кина и пошироката меѓународна заедница за заедничка корист.
Закана од неограничено ширење
Според неговите зборови, од една страна се заканува колапс на меѓународниот поредок за контрола на оружјето и неограниченото ширење на оружјето за масовно уништување со длабоко опасни последици, а од друга, постои алтернативен пат.
Тој, исто така, рече дека безбедносното опкружување можеби се променило, но „принципите за одржување на безбедноста не се промениле“.