Унгарскиот премиер Виктор Орбан ќе се сретне со американскиот претседател Доналд Трамп на 7 ноември во Вашингтон, изјави денеска шефот на неговиот кабинет Гергели Гуљас.
Тој изјави за новинарите дека на состанокот ќе се разговара за агендата што може да доведе до мировен договор во Украина, пренесува Ројтерс.
Орбан претходно изјави дека на планираниот состанок со Трамп ќе разговара за американските санкции против руските нафтени компании, наведува агенцијата.
Унгарија сè уште во голема мера зависи од увозот на нафта и гас од Русија, а за разлика од повеќето членки на Европската унија кои, по руската инвазија на Украина во 2022 година, ја намалија зависноста од руската енергија, Будимпешта дури и го зголеми увозот, објави Блумберг претходно.
Таквата зависност сега претставува ризик за енергетската безбедност на земјата, бидејќи американските санкции против најголемите руски нафтени компании имаат за цел да го принудат претседателот Владимир Путин да преговара за Украина.
Унгарската влада тврди дека поради нејзината позиција без излез на море, нема алтернатива за руската нафта.
Орбан претходно изјави дека Трамп направил грешка со воведувањето санкции за руската нафта.
Минатата недела САД воведоа санкции за двете најголеми руски нафтени компании Роснефт и Лукоил, пренесува Танјуг.