Милијардерот и сопственик на „Фокс њуз“, Руперт Мардок, под заклетва призна дека неколку негови телевизиски водители ја поддржале лагата на поранешниот американски претседател Доналд Трамп дека му биле украдени изборите во 2020 година, откриваат неодамна објавените судски документи.
Мардок го признал ова за време на сведочењето во тужбата за клевета од 1,6 милијарди долари, поднесена против телевизиската мрежа од страна на анкетната компанија Dominion Voting Systems, која ги обвини Fox News и нејзината матична компанија, Fox Corporation, за клевета на нејзиниот углед, објави Танјуг, повикувајќи се на лондонски Гардијан.
Во своето депонирање, Мардок рекол дека водителите Марија Бартиромо, Лу Добс, Шон Ханити и Жанин Пиро го „поддржале“ лажниот наратив промовиран од Трамп.
„Би сакал повеќе да го осудуваме“, рече Мардок, објави во понеделникот Њујорк Тајмс.
Во претходните судски поднесоци, адвокатите на Доминион тврдеа дека водителите на Фокс њуз ги исмевале тврдењата на Трамп за украдени избори додека ги промовирале тие лаги на телевизија.
Почеток на судењето во април
Додека Ханити ја „туркаше“ приказната во своето премиерно шоу, тој наводно напишал дека Трамп „се однесува како лудак“.
Дури и самиот Мардок ги отфрли тврдењата на Трамп, опишувајќи ја опсесијата на поранешниот претседател да докажува дека изборите се украдени како „ужасни работи што ги повредуваат сите“.
Мардок во депонирањето призна дека можел да и нареди на телевизијата да не ги емитува изјавите на адвокатите на Трамп.
„Би можел. Но, јас не“, рече тој.
Професор по право од Харвард неодамна изјави за Гардијан дека „никогаш не видел случај на клевета со толку силни докази што обвинетиот писмено признал дека измислил лажни информации за да го зголеми својот рејтинг и приходите“.
Почетокот на судењето е закажан за средината на април.