Уште еден напад од сом врз пливач се случи во езерото Бромбах во Средна Франконија, Баварија, само две недели откако полицаец застрела џиновска риба која нападна неколку пливачи.
Овој пат, 69-годишен маж е повреден, пишува германскиот „Билд“.
Тој рече дека сомот го нападнал „ненадејно од длабочините и го каснал за рака“.
Човекот успеал да доплива до брегот во близина на Абсберг, каде што му била укажана помош.
Полицијата потврди дека претрпел полесни повреди – само гребнатинка.
Поради нападот, локалните власти ја отстраниле платформата за капење и го затвораат дел од езерото од безбедносни причини.
На 20 јуни, сом долг околу два метри и тежок 90 килограми нападнал пет пливачи на друга локација во езерото.
Не можејќи да обезбеди трајно затворање на тој дел од езерото, полицаецот го еутанизирал за да спречи паника и потенцијално давење.
Рибата подоцна била послужена во локален ресторан во 120 порции, што предизвикало силни реакции од организацијата за заштита на животните ПЕТА.
Според Андре Маше од Рибарското здружение на Средна Франконија, сомовите стануваат агресивни поради ниските нивоа на водата и сезоната на мрестење.
Недостатокот на соодветни места за положување јајца ги принудува да се мрестат под платформи за пливање, кои потоа агресивно ги бранат, рече тој.