Републиканските сојузници на новоизбраниот американски претседател Доналд Трамп во Претставничкиот дом на САД во понеделникот доставија нацрт-закон со кој се овластуваат преговорите за купување на Гренланд, барајќи поширока поддршка за законодавството.
Нацрт-законот се вика „Направи го Гренланд повторно голем“, потврдија од канцеларијата на републиканецот Енди Оглс, кој е автор на законот, и неговата колешка Дајан Харшбаргер.
Копија од нацртот претходно беше објавена од Fox News Digital, а до понеделник наутро десет републикански пратеници го поддржаа.
Трамп претходно изјави дека сака да го направи Гренланд дел од САД и не ја отфрли можноста да користи воена или економска моќ за да ја убеди Данска да ја предаде.
Републиканците освоија тесно мнозинство во Претставничкиот дом и Сенатот на американските избори на 5-ти ноември.
Предлог-законот, доколку биде усвоен, ќе му овозможи на Трамп да влезе во преговори со Данска на 20 јануари, кога ќе ја преземе функцијата претседател.
„Конгресот го овластува претседателот, од 12:01 часот по источно стандардно време на 20 јануари 2025 година, да се обиде да влезе во преговори со Кралството Данска за да обезбеди стекнување на Гренланд од страна на САД.
Гренланд е под контрола на Данска со векови, прво како колонија, а сега како полусуверена територија под Кралството Данска.
Подлежи на данскиот устав, што значи дека за секоја промена на неговиот правен статус ќе бидат потребни уставни амандмани.
Гренландскиот премиер Муте Егеде, кој претходно се залагаше за независност на островот, постојано изјави дека островот не е на продажба и дека граѓаните треба да одлучат за нивната иднина.