Со спортски турнири во Куманово се одбележува „11 Октомври“ (фото)

Со низа спортски активности денеска се одбележува Денот на народното востание на Република Македонија, „11 Октомври“.

Турнири во тенис, пинг-понг и одбојка се манифестациите на кои денеска учествуваат неколку екипи, како од Куманово, така и од другите градови и држави.

Спортските настани се во организација на Општинскиот сојуз на спортови, а како што истакна претседателот Сашо Петрушевски ова е традиција која се негува со години.

– Организирани се низа манифестации, со тоа што веќе во утринските часови е почнат турнирот во пинг понг, исто така сведоци сме на овој настан каде двата тениски клуба организираа натпреварување во тенис, од најмлади категории до сениори, со тоа што имавме оргнаизирано и атлетски митинг на осми, се одржа успешен атлетски митинг каде најмладите и сениорите се натпреваруваа успешно и во 11 часот има организирано турнир во одбојка каде што кумановските одбојкарки кои се освојувачи на куп и државни првенки во Република Македонија ќе организираат заедно со општинскиот сојуз на спортови каде што ќе има четири екипи, вели Петрушевски.

Освен тениските турнири каде покрај двата клубови Тумба и Куманово, организираа повеќе натпревари со гости од Струмица.

Во меѓувреме во спортската сала на Гимназијата „Гоце Делчев“ се одржа меѓународен турнир во пинг понг каде учество зедоа јуниори до 18 години.

– Учествуваат натпреварувачи од три земји, имаме присутно тука на овој турнир 25, што машки, што женски пингпонгари. Ова е трети по ред, од оваа година меѓународен турнир по повод  „11 Октомври“, инаку во ноември месец на 11 ноември тоа ќе биде осми по ред меѓународен турнир, но тоа е за ветерани, а ова е за дечиња, да ги опфатиме сите слоеви, изјави Мики Трендафиловски од Пинг понг клубот Куманово.

Побогата спортска програма, Општинскиот сојуз на спортови, заедно со над 60-те клубови, ќе организира по повод Денот на ослободување на Куманово следниот месец.