Словенија воведува пократка работна недела од 1 јануари 2026 година. Оние постари од 58 години или оние работници со најмалку 35 години стаж ќе ја имаат оваа придобивка.
Во новата година, словенечките работници ќе можат да избираат помеѓу слободен петок, продолжен викенд или шестчасовен работен ден.
„Слободен петок, продолжен викенд или шест часа работа дневно. Работниците кои имаат над 58 години или работеле 35 години сега ќе можат да се договорат за таква работна недела со своите работодавци“, објасни државниот секретар на Министерството за труд Дан Јуван во објава на социјалните мрежи, пренесува Klix.
Станува збор за систем наречен „80-90-100“ од министерството, што значи дека работниците ќе работат 80 проценти од работното време, ќе добиваат 90 проценти од платата за тоа и ќе им бидат покриени 100 проценти од придонесите.
Таа опција ќе им биде достапна на работниците од 1 јануари следната година, а законот што ја овозможува веќе е усвоен, пишува словенечкиот „Свет24“.
Иницијативата има за цел да ги подобри условите за работа и продуктивноста на вработените, особено на оние постари од 58 години или со 35 години стаж.
Одредбите од новиот закон, кој веќе е одобрен од Народното собрание, ќе стапат во сила на 1 јануари следната година.
Некои европски земји веќе експериментираат со пофлексибилно и пократко работно време.
Меѓу нив се Шведска, Финска, Исланд и Холандија, што се покажа како исклучително успешно.
Иако работното време од шест часа сè уште не е законска норма за секого во која било земја од Европската унија, индивидуалните компании и јавните институции го користат.
Една од клучните придобивки е зголемената продуктивност.
Пократкото работно време често води до подобар фокус и ефикасност на работа, бидејќи вработените побрзо ги завршуваат задачите ако знаат дека имаат помалку време на располагање.
Пократкото работно време, исто така, го намалува нивото на стрес и замор.
Вработените имаат повеќе време за одмор, семејство, спорт и други лични активности, што придонесува за подобра рамнотежа помеѓу работата и приватниот живот.
Ова значи помалку исцрпеност, боледувања, подобро ментално здравје и поголемо целокупно задоволство.