Поради ситуацијата во Украина, Словенија го евакуираше персоналот на амбасадата во Киев, но е подготвена да им помогне со оружје на украинските власти, додека амбасадорот Томаж Менчин продолжува со дипломатските обврски, соопштено е во Љубљана.
Министерката за надворешни работи Анже Логар (на фотографијата) објави дека персоналот на амбасадата успешно пристигнал во ЕУ во конвој дипломатски службеници, заедно со двајца членови на словенечкиот владин кабинет кои работеа во Киев за да ја подготват посетата на премиерот Јанез Јанша на земјата, а која во меѓувреме беше одложена, објави Хина.
Логар во порака на Твитер наведува и дека повикал пет лица со титула почесни конзули на Русија во Словенија да и ги вратат конзуларните титули на Москва и дека смета дека тоа е одлука која мора да биде очигледна во сегашната ситуација.
Премиерот Јанез Јанша денеска во 18 часот свика седница на Советот за национална безбедност, на која, покрај претседателот Борут Пахор и претседателот на парламентот, Игор Зорчиќ, беа поканети и лидерите на опозицијата да разговараат за „националните аспекти на руската агресија врз Украина“.
Владата на вонредната седница донесе одлука за „ограничување на словенечкиот воздушен простор“, со која ќе се овозможи „поедноставени процедури за летање на сојузничките воени авиони во случај на преместување на единиците на источното крило на НАТО“, но сето тоа нема да влијае на функционирање на редовен воздушен простор.сообраќај.
Според соопштението по седницата, се разговарало за некои дополнителни мерки на полето на одговор на кризи, при што е прифатен заклучокот за „помош на Украина“ во воена опрема.
„Деновиве ќе донираме шлемови, пушки и муниција на Украина. Сакаме Киев да може да се брани“, изјави словенечкиот министер за одбрана Матеј Тонин за ПОП-ТВ.
Тој во порака на Твитер оцени дека Украина мора да го издржи притисокот на Русија во овие клучни и тешки моменти.
„Доколку Украина биде поразена, тоа би значело нова студена војна, војна во која Европа би платила висока цена“, рече Тонин.