Русија, Кина и Иран се најголемите закани за Шведска, објави денес Шведската безбедносна служба во својот годишен извештај за заканите со кои се соочува земјата.
„Американско-израелската воена операција против Иран и контрамерките што ги спроведе Иран ја зголемија заканата за американските, израелските и еврејските цели во Шведска“, изјави шефот на безбедносната служба, Шарлот фон Есен, според Ројтерс.
Во последните години, безбедносната служба предупредуваше на растечките закани, првенствено од руската држава, која е сè повеќе склона кон ризични потфати во поддршка на нејзината војна во Украина, вклучително и дестабилизирачки хибридни напади низ Европа, потсетува агенцијата, додавајќи дека Иран исто така долго време е етикетиран како сериозна закана.
Како што е наведено, властите забележаа како криминалните мрежи во Шведска, која во изминатата деценија се бори со бран криминал поврзан со банди, биле користени од државни актери за извршување насилни акти.