Шумските пожари што оваа недела зафатија неколку региони на Шпанија уништија речиси 115.000 хектари и предизвикаа затворање на седум патишта, вклучувајќи го и националниот автопат, соопштија шпанските власти.
Најпогодени области се провинциите Оренсе и Замора, каде што пожарот што избувна и се прошири на Санабрија доведе до евакуација на околу 1.700 луѓе, објави „Паис“.
Пожарот е сè уште надвор од контрола, а противпожарните екипи се обидоа да ги заштитат куќите во текот на ноќта.
Воздухопловните сили беа распоредени и утрово.
Покрај тоа, десетици активни пожари беа регистрирани во Галиција, како и во регионите Леон, Астурија и Екстремадура.
Специјализирани единици за итна медицинска помош (ЕМУ) се распоредени на 12 локации, првенствено во Кастиља и Леон и Галиција.
Досега во пожарите загинаа три лица – две во Кастиља и Леон и едно во Мадрид.
Најновата жртва е волонтер, кој беше повреден во пожар во близина на областа Молезуелас де ла Карбаљеда, пожар за кој локалните власти проценуваат дека би можел да стане најсериозниот некогаш регистриран во областа, каде што се уништени повеќе од 30.000 хектари.