Израел и Хамас во среда се согласија за првата фаза од планот на американскиот претседател Доналд Трамп за Газа, што би можело да биде првиот чекор кон завршување на крвавата двегодишна војна што го потресе Блискиот Исток.
Што знаеме за договорот?
Договорот за почетната фаза од рамката од 20 точки на Трамп беше постигнат преку посреднички разговори во Египет, само еден ден по втората годишнина од нападот на Хамас врз Израел, по што следеше разорниот напад на Израел врз Газа.
Трамп објави дека и Израел и Хамас ја потпишаа првата фаза од планот, што наскоро треба да доведе до ослободување на сите живи заложници, како и враќање на телата на загинатите и повлекување на израелските трупи на таканаречената жолта линија во Газа.
Според извор во израелските безбедносни служби, ова е границата за почетното израелско повлекување предвидено во планот на Трамп, објави Ројтерс.
Хамас потврди дека е постигнат договор за завршување на војната, што вклучува израелско повлекување од Газа и размена на заложници и затвореници, но ги повика Трамп и другите лидери да обезбедат Израел целосно да го спроведе прекинот на огнот.
Кои се најголемите непознати?
И покрај надежите дека војната може да заврши, клучните детали се уште се нејасни.
Ова вклучува временска рамка за спроведување на планот и како да се управува со Појасот Газа по војната. Судбината на Хамас е исто така непозната.
Сè уште не е јасно кој ќе управува со Газа по завршувањето на војната. Израелскиот премиер Бенјамин Нетанјаху, Трамп и западните и арапските држави ја отфрлија секоја улога за Хамас, иако Хамас владее со Газа откако ги собори своите палестински соперници во 2007 година.
Оригиналниот план на Трамп предвидува дека Палестинската власт ќе игра одредена улога, но само откако ќе помине низ значајни реформи.
Што е следно?
Нетанјаху рече дека ќе го свика својот кабинет во четврток за да го одобри договорот, а извор од Хамас рече дека живите заложници ќе бидат предадени во рок од 72 часа од одобрувањето на договорот од страна на израелската влада.
Израел соопшти дека ослободувањето на заложниците се очекува во сабота. Од вкупно 48 заложници, се верува дека 20 се уште се живи.
Висок функционер на Белата куќа изјави дека по одобрувањето на договорот, Израел мора да се повлече на договорената линија, што треба да трае помалку од 24 часа, по што започнува рок од 72 часа. Белата куќа очекува ослободувањето на заложниците да започне во понеделник.
Порано во среда, Хамас објави дека доставил списоци на заложници што ги држи и палестински затвореници што сака да ги размени со Израел.
На таа листа наводно се наоѓаат некои од најистакнатите затвореници што Израел некогаш ги држел, чие ослободување било неприфатливо во претходните прекини на огнот.
Трамп треба да отпатува во Египет во наредните денови, а Белата куќа објави дека ја разгледува можноста тој да оди во регионот уште во петок.
Нетанјаху го покани Трамп да се обрати пред израелскиот парламент, а Трамп му рече на Аксиос дека би бил спремен да го стори тоа.
Следната фаза од планот на Трамп бара меѓународно тело, наречено „Одбор за мир“, да ја преземе улогата на управување со Газа по војната.
На чело би бил Трамп, а во него би бил вклучен и поранешниот британски премиер Тони Блер.
Најголемите ризици
Успешното завршување на договорот би претставувало, како што пишува Ројтерс, најголемото достигнување на Трамп во надворешната политика досега, кој ја презеде функцијата во јануари ветувајќи брз крај на војните во Газа и Украина, но откри дека овие конфликти се потешки за решавање отколку што очекуваше.
Хамас досега ги одбиваше израелските повици за предавање на оружјето, а палестински извор вели дека Хамас ќе одбие сè додека израелските трупи ја окупираат палестинската земја.
Два извори запознаени со преговорите потврдија дека главните точки на спор се механизмите на израелско повлекување – Хамас бара јасна временска рамка поврзана со ослободувањето на заложниците и гаранција за целосно повлекување на израелските сили.
Во Газа, Израел го намали интензитетот на воената кампања по барање на Трамп, но не ги запре целосно нападите.
Арапските земји кои го поддржуваат планот тврдат дека тој мора да доведе до конечна независност на палестинска држава, што Нетанјаху го отфрла.
Хамас изјави дека ќе ја предаде администрацијата на Газа на техничка палестинска влада под надзор на Палестинската самоуправа и со поддршка на арапските и муслиманските држави.
Тој отфрла каква било улога на Тони Блер или странска власт над Газа.