Руски товарен авион што вообичаено се користи за транспорт на воена опрема слета на воениот аеродром во Хавана во неделата навечер, потсетувајќи на шемите на летање видени пред апсењето на Николас Мадуро во Венецуела.
Авионот „Иљушин Ил-76“, санкциониран од САД, управуван од руската државна авиокомпанија „Авијакон Зитотранс“, беше следен како слетува на аеродромот „Сан Антонио де лос Бањос“, кубанска воена база околу 50 километри јужно од Хавана, според јавно достапните податоци за летот, објави „Фокс њуз“.
Записите за следење на летот покажуваат дека овој авион застанал во Санкт Петербург и Сочи во Русија, Мавританија во Африка и Доминиканската Република пред да слета во Куба.
Секое слетување би барало одобрение од владите домаќини, отворајќи ја можноста земјите да продолжат да дозволуваат руска воена активност и покрај западните санкции.
Истиот авион извршил претходни летови до Венецуела, Никарагва и Куба кон крајот на октомври 2025 година, додека тензиите меѓу Вашингтон и Каракас ескалираа.
Тој потег му претходеше на воената акција на САД во Венецуела, која на крајот го заврши владеењето на Мадуро, низа што американските претставници и аналитичарите ја посочуваат како црвено светло кога проценуваат слична руска авијациска активност во регионот.
Сега кубанскиот претседател Мигел Дијаз-Канел е под зголемен притисок од американскиот претседател Доналд Трамп, кој значително ја интензивираше американската политика кон Хавана во последните недели.
Трамп прогласи национална вонредна состојба во врска со Куба, тврдејќи дека кубанската влада претставува „невообичаена и вонредна закана“ за националната безбедност и интересите на надворешната политика на САД.
Администрацијата, исто така, рече дека ќе воведе казни за секоја земја што продава или испорачува нафта на Куба без овластување од САД.
Трамп потврди дека САД се во директни разговори со кубанските претставници.
„Куба е нација во недостиг. Тоа беше долго време, но сега ја нема Венецуела да ја поддржи“, им рече Трамп на новинарите во Мар-а-Лаго, Флорида.
„Значи, разговараме со луѓе од Куба, највисоките луѓе во Куба, за да видиме што ќе се случи. Мислам дека ќе склучиме договор со Куба“.
Трамп и државниот секретар Марко Рубио изразија поддршка за политички промени во Хавана, иако администрацијата не изјави дали ќе ја оствари таа цел со воена акција.
Руските воени врски со Куба постојано предизвикуваат загриженост во Вашингтон.
Додека присуството на Советскиот Сојуз на островот се намали по Студената војна, Москва постепено ја обновуваше соработката во одбраната и разузнавањето со Хавана во текот на изминатата деценија.
Американските претставници предупредија дека обновената руска активност на Куба може да претставува безбедносни ризици во близина на копното на САД.
„Ил-76“ е тежок транспортен авион способен да носи околу 50 тони товар или до 200 луѓе, што предизвика големо внимание со оглед на историјата на операторот.
Авиакон Зитотранс е санкционирана од САД, Канада и Украина за поддршка на рускиот одбранбен сектор.
„Оваа компанија снабдувала воена опрема како што се ракети, боеви глави и делови за хеликоптери низ целиот свет“, соопшти Министерството за финансии на САД во јануари 2023 година, кога ја додаде авиокомпанијата на својата листа на санкции.
Останува нејасно каков товар носел авионот на својот последен лет. За време на претходните операции во Венецуела, руските државни медиуми и еден руски пратеник соопштија дека истиот авион испорачал во Каракас системи за воздушна одбрана со краток дострел „Панцир-С1“ и среден дострел „Бук-М2Е“.