Шпанските разузнавачки служби не се сомневаат дека Кремљ стои зад убиството во Аликанте на Максим Кузминов, руски капетан кој во август пребегна во Украина со својот борбен хеликоптер Ми-8, пишува шпански „Паис“.
Весникот, исто така, посочува дека шпанската влада, сепак, била многу внимателна во јавните изјави за убиството.
„Мораме да ја оставиме Цивилната гарда да ја врши својата работа и да дозволиме истрагата да напредува“, рече владината портпаролка Пилар Алегрија по состанокот на Советот на министри во вторникот.
Сепак, дипломатски извори велат дека се работи за „многу сериозна“ работа, иако се уште чекаат да соберат доволно информации.
Доколку се потврди вмешаноста на руските власти, додаваат тие, Шпанија ќе даде „силен одговор“.
Додека во Шпанија се уште не е потврден идентитетот на убиениот, руските медиуми први ја објавија смртта на Кузминов, кого го припишуваат на проблеми со алкохолот и дрогата, додавајќи дека тој станал „непријатен и опасен сведок“ за Киев.
Откако веста беше потврдена од Украина, шефот на руската служба за надворешно разузнавање (СВР) Сергеј Наришкин во вторникот изјави дека жртвата е „криминален предавник“ и „морален труп“ бидејќи пребегнал од својата земја.
Во октомври, руската јавна телевизија тврдеше, прикажувајќи тројца наводни членови на ГРУ, дека им било наредено да го елиминираат дезертерот.
„Нема да живее доволно долго за да му се суди“, рекол еден од нив.
Експертите се прашуваат дали операцијата е дело на Странската разузнавачка служба (СВР), чиј шеф го оправда убиството; Федералната служба за безбедност (ФСБ), наследникот на КГБ или Воената разузнавачка служба (ГРУ), бидејќи Кузминов бил капетан и со тоа потпаднал под негова јурисдикција.
Шпанските разузнавачки извори сепак признаваат дека е многу тешко истрагата да најде докази за вмешаност на некој од нив.
Тие претпоставуваат дека злосторството го извршиле вооружени мажи (најверојатно убијци) кои пристигнале надвор од Шпанија, а сега се во странство.
Телото на Кузминов беше пронајдено во вторник, на 13 февруари во гаража во Вилајојоса (Аликанте), иако неговата смрт беше откриена дури во понеделникот.
Откако го застрелале, убијците го прегазиле со сопствен автомобил, кој бил пронајден изгорен во блискиот град Ел Кампело.