Локалните власти во југоисточниот шпански град Умила им забранија на муслиманите да користат јавни простори, како што се спортски сали и општински простории, за да слават верски празници.
Оваа забрана, прва од ваков вид во Шпанија, ја воведе конзервативната Народна партија (ПП), која е на власт во тој град, објави Гардијан.
За време на усвојувањето на забраната, екстремно десничарската партија Вокс се воздржа од гласање, а претставниците на локалните левичарски партии беа против неа.
Во образложението на одлуката се наведува дека спортските објекти и општинските простории не можат да се користат за верски, културни или социјални активности што се туѓи на нашиот идентитет, освен ако не се организирани од локалните власти.
Членовите на локалниот огранок на партијата Вокс ја поздравија оваа одлука, наведувајќи дека Шпанија е и секогаш ќе биде христијанска земја.
Претседателот на Шпанската федерација на исламски организации, Мунир Бензелун Андалузи Ажари, изјави за весникот Ел Паис дека одлуката е исламофобична и дискриминаторска.
– Тие не одат против другите религии, тие одат само против нашите – рече тој, додавајќи дека е изненаден од неодамнешното зголемување на расистичката реторика и напади во Шпанија и дека чувствува страв за прв пат по 30 години.
Лидерот на социјалистите во регионот Мурсија, Франциско Лукас, на Платформата X објави дека Народната партија го крши Уставот и ја става во опасност социјалната кохезија во својата потрага по власт.
Поранешната социјалистичка градоначалникка на Умила, Хуана Гвардиола, праша што се подразбира под идентитет, потсетувајќи на вековите муслиманско наследство во областа.
Умила, град во регионот Мурсија, има околу 27.000 жители, од кои 7,5 проценти доаѓаат од земји со муслиманско мнозинство.
Оваа одлука речиси сигурно ќе биде оспорена бидејќи го крши членот 16 од шпанскиот Устав, во кој се наведува дека слободата на идеологијата и религијата се загарантирани и дека нема потреба да се ограничува нивното изразување за да се одржи јавниот ред, бидејќи тие се заштитени со закон.