Шпанија ги одложи плановите за купување на борбени авиони Ф-35, произведени од американската компанија Локид Мартин, објави шпанскиот весник Паис, повикувајќи се на неименувани владини извори.
Во буџетот за 2023 година, 6,25 милијарди евра беа наменети за купување нови борбени авиони, но поголемиот дел од дополнителните 10,5 милијарди евра наменети за одбранбениот сектор оваа година беа пренасочени кон проекти во Европа, објави весникот.
Купувањето на Ф-35 Лајтнинг II, авион од петта генерација, е суспендирано на неодредено време.
Иако Локид Мартин тврди дека авионите Ф-35 наменети за Шпанија ќе бидат произведени во Италија, што би ги направило европски, постои уште една причина зошто тие не се толку привлечни, дури ни за војската, а тоа е што САД воведоа строги ограничувања за пристап до критичните технологии на авионите, кои се црна кутија за самите корисници, а нивната употреба во потенцијален конфликт би можела да биде забранета од Вашингтон.
Шпанскиот премиер Педро Санчез претходно најави зголемување на воените трошоци за да ѝ помогне на Шпанија да ја исполни целта на НАТО од два проценти од БДП, но за време на самитот во јуни тој одби да оди понатаму и да ја зголеми алокацијата на пет проценти, предизвикувајќи критики од американскиот претседател Доналд Трамп.
Трамп потоа се закани дека ќе воведе дополнителни царини за шпанска стока.
Портпаролите на шпанското Министерство за одбрана и „Локид Мартин“ не одговорија на барањата за коментар.