Шестгодишно дете загина, а пет лица се повредени во напад на украински дрон врз руската област Краснодар на југозапад, изјави денеска регионалниот гувернер Вањамин Кондратиев.
„За жал, шестгодишно девојче им подлегна на повредите во болница по напад со дрон во Приморско-Ахтарск, град во Краснодарската област“, изјави гувернерот преку Телеграм, додавајќи дека пет лица се повредени и пренесени во болници.
Тој рече дека „киевскиот режим“ повторно се обидел да нападне со дрон врз цивилни цели во областа.
Според него, руските сили собориле неколку беспилотни летала во Приморско-Ахтарск.
„По нападот е оштетена трикатна станбена зграда, а жителите се евакуирани“, рече Кондратиев, додавајќи дека е погодена важна енергетска централа и нејзината работа е нарушена.
Украина ги засили нападите на руска територија оваа година, насочени кон енергетски објекти за кои се верува дека ја снабдуваат руската војска, како и села и градови долж границата.