Либанскиот министер за надворешни работи Абдула Бу Хабиб изјави дека неговата земја не сака војна со Израел и дека е заинтересирана за мир, пишува Jerusalem Post (JP).
Хабиб тоа го истакна во пораката што ја испрати до шефот на израелската дипломатија Израел Кац преку министерот за надворешни работи на Азербејџан Џејхун Бајрамов.
Кац, пак, испрати порака до Хабиб во која му посочи дека Израел мора да ги врати во своите домови своите жители на северот на земјата, кои беа евакуирани поради постојаните напади на либанската проиранска милитантна група Хезболах, и дека, ако тоа не е можно врз основа на дипломатско решение, тоа ќе се постигне со војна.
Во неговиот разговор со Бајрамов, Кац го обвини Иран, кој граничи со Азербејџан, за подгревање на тензиите во регионот.
Либан и Израел немаат дипломатски односи, па комуникацијата меѓу двете земји често се одвива преку трета страна.
Хабиб зборуваше поради зголемените стравувања од избувнување на војна меѓу Либан и Израел по речиси девет месеци меѓусебни прекугранични напади меѓу израелската војска и Хезболах.
Хезболах започна напади во северен Израел во знак на солидарност со Хамас по почетокот на војната во Појасот Газа во октомври минатата година.
Хезболах најави дека нема да ги запре нападите врз северен Израел се додека не се постигне траен прекин на огнот во Појасот Газа.
Околу 60.000 Израелци кои беа евакуирани од своите домови на северот на земјата во октомври не можат да се вратат дома.
Американскиот државен секретар Ентони Блинкен во понеделникот изјави дека Израел практично го изгубил суверенитетот над северниот дел на земјата, имајќи предвид дека тој не е безбеден за Израелците.