Северна Кореја денес лансираше балистичка ракета која слета во близина на ексклузивната економска зона на Јапонија, изјави јапонскиот премиер Санае Такаичи.
Како што е наведено, досега не се пријавени штети на авиони или бродови, пренесува Кјодо.
Во Токио, Такаичи изјави дека им наредила на надлежните владини агенции брзо да ги достават потребните информации до јавноста и да обезбедат безбедност низ целата земја.
Во меѓувреме, војската на Јужна Кореја соопшти дека открила неидентификувана балистичка ракета лансирана кон Јапонското Море од областа Таегван во севернокорејската покраина Северен Пјонган околу 12:35 часот по локално време.
Јонхап потсетува дека лансирањето се случило само еден ден откако Пјонгјанг ги осуди најновите санкции на САД против осум севернокорејски лица и два субјекта за перење пари поврзани со сајбер криминал.