Повеќето луѓе носат сувенири од патувањата, како што се магнети, синџири за клучеви или разни локални предмети.
Еден човек приведен од австриската полиција на аеродромот се обидувал да пренесе камелеони од Африка.
Овој чуден товар тој сакал да го прошверцува во куфер, криејќи ги влекачите во чорапи или кутии за сладолед.
Австриските власти приведоа 56-годишен маж на еден аеродром во Виена со куфер полн со камелеони додека се подготвувал да го напушти својот гејт.
Х-зраците, низ кои мора да помине багажот на секој патник, откриле необичен товар во куферот, кој веднаш го мобилизирал персоналот на аеродромот.
Човекот се обидел да ги пренесе животните во Виена од главниот град на Етиопија, Адис Абеба.
Локалните власти го привеле на аеродромот во Виена на 20 јануари.
„Набргу стана јасно дека во куферот има живи суштества кои ќе бидат добро камуфлирани во природната средина, но на крајот тие не можеа да ја измамат рендгенската машина“, велат властите во соопштението.
Камелеоните веднаш биле пренесени во зоолошката градина во Виена Шенбрун, каде било наведено дека две животни не го преживеале патувањето. Сите животни потекнувале од планините Усамбара во Танзанија. Иако меѓу влекачите имало возрасни видови, некои камелеони биле стари едвај една недела.
„Рептилите сега се сместени во терариуми кои ги задоволуваат нивните специфични потреби, вклучително и високи нивоа на влажност во земјата и воздушна и ладна околина“, се вели во соопштението.
Австриското Министерство за финансии изјави дека камелеоните биле наменети за продажба во соседната Чешка и дека според проценките, мажот на црниот пазар можел да добие вкупно до 37.000 евра.
Приведениот сега се соочува со парична казна од 6.000 евра.