Сателитските снимки кои денеска ги анализира АП покажуваат дека израелската армија започнала копнена офанзива во јужните делови на Појасот Газа во војната против Хамас.
По истекот на привремениот прекин на огнот и размената на заложниците кои Хамас ги држеше за Палестинците во израелските затвори, израелската армија започна тешки бомбардирања и копнени судири на југот на Појасот Газа.
Снимката објавена од Planet Labs PBS го дава првиот јасен увид на интензитетот и обемот на борбата.
Снимките од неделата покажаа израелски тенкови и оклопни транспортери на само шест километри северно од центарот на Кан Јунис, главниот град во јужниот дел на Појасот Газа.
Многу жители кои избегаа од израелската офанзива и бомбардирањето во градот Газа на север, сега живеат околу Кан Јунис и другите околни области откако израелската армија им нареди да се евакуираат.
Израелските војници се распоредија западно од Салах ал-Дин, главниот коридор север-југ на Појасот Газа низ кој побегнаа многу Палестинци.
Анализата на АП покажа позиции на четири локации со околу 150 оклопни транспортери, тенкови и други возила.
На некои места, израелските војници поставија пречки околу некои позиции кои можат да се користат како покритие.
На теренот се гледаат свежи траги од движење на тенкот.
Израелската војска не одговори веднаш на барањето на АП за коментар за стратегијата за офанзивата и што покажува снимката.
Сепак, маневрите и бројот на возила сугерираат дека армијата потенцијално се подготвува да се пресели во Кан Јунис. Веќе има извештаи за конфликт во областа.