Сателитски фотографии од компанијата за вселенско разузнавање „Вантор“, направени во последните 48 часа, покажуваат значителна штета на нуклеарниот објект Натанз, најголемиот центар за збогатување ураниум во Иран и еден од најчувствителните воени објекти во земјата, според анализата на снимката на CNN.
Како што е прикажано на снимката, погодени се голем магацин и две помали двокатни згради кои служеле како пристапни точки за работниците и возилата за пристап до подземните објекти.
Овој визуелен доказ е во спротивност со тврдењата на шефот на Меѓународната агенција за атомска енергија (МААЕ), Рафаел Гроси, кој претходно изјави дека „нема индикации“ за оштетување на нуклеарните објекти на Иран, истакнува CNN.
„Немаме индикации дека некој од нуклеарните објекти е оштетен или погоден“, рече тој, додавајќи дека МААЕ продолжува да се обидува да контактира со нуклеарното регулаторно тело на Иран преку Центарот за инциденти и вонредни ситуации на МААЕ, пренесува АП.
Иако штетата на објектот изгледа релативно мала, таа бледее во споредба со двата американски напади на истото место во јуни минатата година, кога американските сили користеа муниција за уништување бункери и крстосувачки ракети.
Амбасадорот на Иран во Меѓународната агенција за атомска енергија (МААЕ), Реза Наџафи, вчера изјави дека за време на американските и израелските воени операции против Иран, бил погоден големиот нуклеарен комплекс на Иран Натанз.
„Вчера, тие ги нападнаа мирнодопските нуклеарни објекти на Иран кои повторно се под меѓународен надзор“, изјави Наџафи за новинарите на седницата на 35-члениот Одбор на директори на МААЕ, пренесува Ал Арабија.
фото: vantor.com