Американската војска соопшти дека запленила уште еден танкер поврзан со Венецуела во Карипското Море, седма таква заплена од почетокот на кампањата на Доналд Трамп за контрола на венецуелската нафта.
Јужната команда на американската војска, која надгледува повеќе воени бродови и илјадници војници во регионот, изјави дека моторниот брод Сагита е приведен „без инциденти“, објави Ројтерс.
Во соопштението се додава дека заплената на танкерот, кој работел спротивно на карантинот за санкционирани бродови во Карипското Море, ја покажува решеноста на САД дека единствената нафта што излегува од Венецуела се извезува на координиран и законски начин.
Администрацијата на Трамп ја фокусираше својата стратегија за надворешна политика во Латинска Америка на Венецуела, со цел да ја преземе контролата врз нејзините нафтени ресурси, објаснува Ројтерс.
По апсењето на венецуелскиот претседател Николас Мадуро на 3 јануари, САД планираат долгорочно управување со венецуелската нафтена индустрија.
Претходно запленетите танкери биле или под санкции на САД или биле дел од „сенката флота“. Станува збор за бродови што го прикриваат своето потекло за да транспортираат нафта од земји под санкции, вклучувајќи ги Иран, Русија и Венецуела.