Американските разузнавачи се „многу уверени“ дека експлозијата во болница во Газа минатата недела била предизвикана од палестинска ракета која се распаднала во лет, а не од Израел, изјави во вторникот американски официјален претставник.
Министерството за здравство на Газа, управувано од Хамас, соопшти дека 471 лице загинало во експлозија во болницата Ал-Ахли ал-Араби на 17 октомври.
Палестинците и арапските држави објавија дека болницата била погодена во израелски воздушен напад.
Израел соопшти дека експлозијата била предизвикана од неуспешно лансирање ракета од страна на палестинската милитантна група Исламски џихад, која ја негираше одговорноста.
Американскиот претседател Бајден рече еден ден по инцидентот, при посетата на Тел Авив, дека експлозијата се чини дека е резултат на залутана ракета истрелана од „терористичка група“, повторувајќи ја позицијата на Израел.
Њујорк Тајмс, Ен-Би-Си Њуз и други американски медиуми објавија за проценката на американските разузнавачки служби претходно во вторникот, цитирајќи брифинг со новинарите.
Американски официјален претставник одбил да биде именуван бидејќи информациите остануваат доверливи.
Официјални лица изјавија дека се уште не е познат точниот број на загинати и ранети, објави Њујорк Тајмс.
Тие рекоа и дека е направена мала штета на болницата и дека зградата не се срушила, пренесе тој.
Проценката на разузнавањето се заснова на израелското прислушување на палестински групи, јавно достапни видеа, прислушувани комуникации обезбедени од Израел и слики од експлозијата и нејзините последици, изјавија властите за новинарите.
Некласифицираниот извештај на американското разузнавање, кој го видел Ројтерс два дена по експлозијата, го наведува бројот на загинати „веројатно на долниот дел од опсегот од 100 до 300“, но додаде дека проценката може да биде поголема.