САД размислуваат да ги прогласат јеменските Хути за терористичка организација откако милитантната бунтовничка група киднапираше товарен брод, изјави портпаролот на Белата куќа за национална безбедност Џон Кирби.
Ројтерс известува дека коментарот на Кирби е значаен бидејќи една од првите работи што ги направи претседателот Џозеф Бајден кога ја презеде функцијата во јануари 2021 година беше отстранувањето на ознаката „терористичка организација“ за Хутите, поради загриженост дека санкциите би можеле да ја влошат хуманитарната криза во Јемен.
Во неделата Хутите го киднапираа бродот Галакси Лидер, сопственост на Израел, на југот на Црвеното Море.
Кирби рече дека тоа е „најгрубо кршење на меѓународното право“ и дека „Иран е соучесник“ во тоа.
– Во оваа светлина, почнавме да размислуваме за прогласување на Хутите за терористичка организација и ќе разгледаме други опции, како со нашите сојузници, така и со нашите партнери – рече Кирби на прес-конференцијата, повикувајќи ги Хутите веднаш да го ослободат бродот и неговиот екипажот.
Товарниот брод „Galaxy Leader“, под знаме на Бахамите, кој е во сопственост на Британците, е управуван од јапонска компанија, но има врски со израелскиот бизнисмен Абрахам Унгар.
– Запленувањето на бродот е само почеток – изјави во неделата портпаролот на Хутите, Мохамед Абдул Салам, во соопштение објавено на платформата Икс (Твитер) и најави нови поморски напади додека Израел не престане со нападите врз Газа.
Брод кој пловел за Индија од Турција бил пренасочен кон јеменското пристаниште Салиф во провинцијата Ходеида, соопшти поморската безбедносна компанија Амбри, истакнувајќи дека членовите на екипажот се Украинци, Бугари, Филипинци, Мексиканци и еден Романец.