Централната команда на Соединетите Американски Држави (CENTCOM) денеска објави на X, поранешен Твитер, дека бродот на американската крајбрежна стража привремено распореден во Арапското Море запленил „напредно конвенционално оружје и друга смртоносна помош“ со потекло од Иран.
Смртоносниот товар бил запленет на брод во Арапското Море, кој се движел кон областа на Јемен контролирана од исламистичките бунтовници Хути.
Во соопштението се вели дека бродот USCGC Clarence Sutphin Jr од класата Сентинел на крајбрежната стража го лоцирал бродот и американските сили се качиле на него.
Откриени се повеќе од 200 пакети со компоненти за балистички ракети со среден дострел, експлозиви, компоненти за беспилотни подводни и површински возила, воена комуникациска и мрежна опрема, склопови за фрлачи на противтенковски наведувани ракети и други воени компоненти.
Директното или индиректното снабдување, продажба или пренос на таква помош ја прекршува резолуцијата 2216 на Советот за безбедност на ОН, објави американската војска.
„Ова е уште еден пример за злонамерната активност на Иран во регионот“, рече генералот Мајкл Ерик Курила, командант на ЦЕНТКОМ.
„Нивното континуирано снабдување со напредно конвенционално оружје за Хутите е директно кршење на меѓународното право и продолжува да ја поткопува безбедноста на меѓународната пловидба и слободниот проток на трговија“, додаде тој.