Соединетите Американски Држави следниот месец ќе ја тестираат можноста Американците со палестинско потекло да патуваат во Израел, како дел од подготовките за предложените ослободувања од визниот режим за Израелците, изјави денеска американски претставник, пренесува Танјуг.
Израел исполни некои услови за американската програма за укинување на визите (VWP), во која се очекува да биде примен до октомври, објави Ројтерс.
Сега Тел Авив мора да ја покаже својата подготвеност да дозволи непречен пристап на палестинските Американци до границата меѓу Израел и Западниот Брег окупиран од Израел.
„Израел сè уште има важна работа што треба да ја заврши во кратка временска рамка“, рече портпаролот на американската амбасада, додавајќи дека тоа ќе повлече „проширување на реципрочните привилегии, вклучително и дозволување на американските Палестинци да патуваат до и низ Израел“.
Пилот програма
Израелскиот министер за надворешни работи Ели Коен во неделата изјави дека пилот-програмата за кандидатурата за VWP на земјата ќе биде лансирана во средината на јули.
Официјален претставник запознаен со подготовките рече дека пилот-програмата ќе вклучува период од 30 до 45 дена во текот на кој американските делегати ќе го надгледуваат палестинско-американското патување преку аеродромот Бен Гурион и преку контролните пунктови на Западниот Брег.
Тоа би можело да ја отежне работата на израелските сили во време на тековно насилство на Западниот Брег, територии каде што Палестинците се надеваат да основаат независна држава и покрај речиси деценискиот застој во мировните преговори поддржани од САД.
Администрацијата на Бајден, исто така, се судри со израелската влада околу нејзината политика за еврејски населби на Западниот Брег.
Со исклучок на Газа
Пилот програмата ќе го тестира пристапот не само за палестинските Американци кои живеат во САД, туку и за оние со седиште на Западниот Брег.
„Ако сте Американец со палестинско потекло, живеете во Рамала, тоа значи дека можете да поминете до 90 дена во Тел Авив со израелска влезна виза“, изјави за Ројтерс функционерот, кој одби да биде именуван.
Во проценката, за која се вели дека делумно се заснова на податоците од американскиот попис, Фондацијата Арапско-американски институт проценува дека бројот на Американци со палестинско потекло е помеѓу 122.500 и 220.000.
Помеѓу 45.000 и 60.000 од нив се на Западниот Брег, изјави официјален претставник запознаен со подготовките на VWP, додавајќи дека пилот-програмата нема да важи за Појасот Газа под власта на исламистичкиот Хамас.