Палестинската самоуправа (ПА) вечерва изрази „длабоко жалење и чудење“ поради одлуката на Вашингтон да ги суспендира визите пред сесијата на Генералното собрание на ОН следниот месец, повикувајќи ги САД да ја поништат оваа одлука.
Во соопштението на ПА се нагласува дека оваа одлука на САД е во спротивност со меѓународното право и Договорот за седиштето на ОН, особено затоа што „Државата Палестина е членка набљудувач на Обединетите нации“, објавува Вафа.
Палестинското претседателство ја повика американската администрација да ја преиспита и поништи оваа одлука, потврдувајќи ја целосната посветеност на Палестина на меѓународното право, резолуциите на ОН и обврските за мир.
Стејт департментот претходно денес објави дека САД ги одбиваат и поништуваат постојните визи за членовите на ПЛО и Палестинската самоуправа (ПА) пред Генералното собрание на ОН во септември.
Ограничувањата значат дека палестинскиот претседател Махмуд Абас, кој управува со окупираниот Западен Брег, веројатно нема да може да патува во Њујорк за да се обрати на годишниот собир, како што обично прави, објавува Ројтерс.
„Палестинската самоуправа, исто така, мора да ги прекине своите обиди да ги заобиколи преговорите преку меѓународни правни кампањи, вклучително и жалби до Меѓународниот кривичен суд и Меѓународниот суд на правдата, како и напори за обезбедување еднострано признавање на палестинската држава“, се вели во соопштението на Стејт департментот.