Државниот секретар на САД и министрите за надворешни работи на Франција, Германија и Велика Британија се согласија дека крајот на август ќе биде вистинскиот рок за постигнување нуклеарен договор со Иран, дознава „Аксиос“.
Доколку не се постигне договор до крајот на август, ќе се активира „механизмот за враќање“.
Ова значи автоматско враќање на сите санкции на Советот за безбедност на ОН што беа укинати според нуклеарниот договор со Иран од 2015 година.
Американските и европските претставници го гледаат механизмот како средство за притисок врз Техеран во случај дипломатските напори да не успеат.
Од друга страна, Иранците тврдат дека нема законска основа за повторно воведување санкции и се закануваат дека ќе се повлечат од Договорот за неширење на нуклеарно оружје како одговор.
„Ќе одговориме на повторното воведување санкции поради нуклеарната програма“
Иран ќе одговори на какво било повторно воведување санкции поради неговата нуклеарна програма, изјави портпарол на Министерството за надворешни работи во понеделник, без да прецизира какви мерки би можел да преземе Техеран.
Француски дипломатски извор минатата недела изјави за Ројтерс дека европските земји ќе мора да ги обноват санкциите на ОН против Иран како дел од таканаречениот „механизам за враќање на сила“, доколку не се постигне нуклеарен договор што би ги гарантирал европските интереси во сферата на безбедноста.
Споменатиот механизам се однесува на резолуцијата 2231 на Советот за безбедност на ОН, која е дел од нуклеарниот договор од 2015 година, и вклучува автоматско враќање на санкциите од претходните резолуции за Иран во случај на „значајно отстапување“ од преземените обврски на исламскиот режим во Техеран.