Синоќа, Соединетите Американски Држави апелираа до Советот за безбедност на Обединетите нации (СБОН) да го поддржи трифазниот план објавен од американскиот претседател Џозеф Бајден со цел да се стави крај на војната во Газа, да се ослободат сите заложници и да се испрати голема количина помош за уништената територија.
Амбасадорката на САД во ОН Линда Томас-Гринфилд изјави дека САД ја споделиле нацрт-резолуцијата со другите членки на Советот за безбедност за да го поддржат крајот на конфликтот што започна со ненадејниот напад на Хамас на 7 октомври минатата година на југот на Израел во кој загинаа околу 1.200 луѓе, главно цивили.
„Бројни лидери и влади, вклучително и оние во регионот, го поддржаа тој план и го повикуваме Советот за безбедност да им се придружи во повикот за спроведување на тој договор без одлагање и без дополнителни услови“, се вели во изјавата на амбасадорот.
Нацрт-резолуцијата добиена од агенцијата АП го поздравува договорот објавен од Бајден на 31 мај и го повикува Хамас „да го прифати целосно и да ги исполни своите услови без одлагање и без услови“.
Хамас веќе објави дека позитивно гледа на предлогот. Нацртот не го споменува прифаќањето на договорот од страна на Израел.
Кога Бајден го објави предлогот за договорот, тој го нарече понуда на Израел која вклучува одржлив прекин на огнот и повлекување од Газа, доколку Хамас ги ослободи сите заложници што ги држеше.
Израелскиот премиер Бенјамин Нетанјаху им рекол на своите „тврдокорни“ партнери во владата дека предлогот што го објави Бајден ќе ја постигне целта на Израел да го уништи Хамас, објавија локалните медиуми.
Ултранационалистите се заканија дека ќе ја соборат владата на Нетанјаху доколку таа се согласи на договор што „не целосно го елиминира“ Хамас.
Во понеделникот Нетанјаху пред парламентарната Комисија за надворешна политика и безбедност изјави дека Бајден понудил нацрт-договор, но не ги навел сите детали, велејќи дека постои јаз меѓу израелската верзија на договорот и онаа што ја презентирал американскиот лидер.
Бајден најави дека првата фаза од предложениот договор ќе трае шест недели и ќе вклучува „целосен прекин на огнот“, повлекување на израелските сили од станбените области на Газа и ослободување на некои заложници, вклучувајќи жени, постари лица и повредени во замена за ослободување на илјадници палестински затвореници.
Во таа фаза американските заложници би биле ослободени, а посмртните останки на убиените заложници би биле вратени на нивните семејства.
Хуманитарната помош би се зголемила и по 600 камиони би влегувале во Газа секој ден.
Во втората фаза би биле ослободени преостанатите живи заложници, вклучително и војниците, а израелските сили би се повлекле од Газа.
Бајден рече дека доколку Хамас ги исполни своите обврски, прекинот на огнот ќе стане „траен прекин на непријателствата“.
Во третата фаза, планот што го објави Бајден предвидува реконструкција на Газа, за која се очекува да трае со децении.
Нацрт-резолуцијата ја нагласува важноста Израел и Хамас да се придржуваат до договорот откако ќе се согласат со него за траен прекин на непријателствата и ги повикува земјите-членки и ОН да го поддржат спроведувањето.
Тој, исто така, ја повторува непоколебливата поддршка за решение на конфликтот со две држави и важноста на обединетиот Појас Газа и Западниот Брег под палестинската управа.
Американскиот амбасадор оцени дека членките на Советот за безбедност, вкупно 15 земји, не треба да ја пропуштат оваа можност.