Администрацијата на американскиот претседател Доналд Трамп побара од островската држава Палау во Тихиот Океан да прифати мигранти кои моментално се наоѓаат на територијата на САД, како дел од пошироките напори за депортација на мигранти.
Според нацрт-договорот, до кој британскиот „Гардијан“ имаше пристап, Палау, земја со околу 18.000 жители, разгледува предлог за прием на „државјани од трети земји“ од САД кои бараат заштита и одбиваат да се вратат во своите матични земји.
Документот не го наведува бројот на лица кои би можеле да бидат префрлени, ниту што би добил Палау за возврат.
„Двете страни ќе ги земат предвид барањата од државјани од трети земји за азил, статус на бегалец или еквивалентна привремена заштита“, се вели во нацрт-договорот.
Во документот, исто така, се наведува дека САД нема да префрлаат малолетници без придружба во Палау.
Претседателот на Палау, Сурангел Випс Џуниор, во придружното писмо истакна дека предлогот не е конечен и е предмет на понатамошни дискусии.
Палау, наведува тој, „ќе има целосно дискреционо право да прифати или одбие кое било лице“.
Ова барање, како што објаснува лондонскиот весник, е најновиот обид на администрацијата на Трамп да депортира мигранти од САД во трети земји.
Одлуката на Врховниот суд на САД во јуни ги овозможи ваквите трансфери, а првите примери веќе се евидентирани, вклучително и трансферот на граѓани на Јужен Судан и Есватини.
Поранешната комесарка на Службата за имиграција и натурализација на САД, Дорис Мајснер, изјави дека договорот со Палау потсетува на слични барања што администрацијата на Трамп ги испратила до голем број други земји, а според неа, целта на овие мерки е да се зголеми чувството на страв кај мигрантите во САД.
„Повеќето од овие земји се мали, оддалечени и целосно непознати за мигрантите. Ова е дел од тактика за заплашување на мигрантските заедници и нивно принудување да заминат по сопствена иницијатива“, рече Мајснер.
За разлика од САД, Палау не е потписник на Конвенцијата на ОН за бегалци, која ги дефинира правата и обврските на земјите при прифаќање луѓе кои бегаат од прогон, и во овој контекст, во нацрт-договорот се наведува дека Палау ќе дејствува „во согласност со својот устав и хуманитарните принципи“, забележува „Гардијан“.
Ова не е прв пат САД да побараат од Палау да прими луѓе. Во 2009 година, Палау прифати 17 кинески муслимани кои беа притворени во Гвантанамо.