Руската армија објави дека отвора „отворен и безбеден“ коридор за украинските цивили да го напуштат Киев, јавува Си-Ен-Ен.
„Апелираме до граѓаните на Киев. Сите цивили во градот можат слободно да ја напуштат украинската престолнина по автопатот Киев-Василков). Оваа рута е отворена и безбедна“, изјави портпаролот на Министерството за одбрана на Русија, Игор Конашенков, се наведува во соопштението.
„Уште еднаш, би сакал да нагласам дека вооружените сили на Руската Федерација цели само на воени цели. Цивилното население не е во опасност“, додаде тој.
Најмалку 352 цивили во Украина се убиени од почетокот на инвазијата, меѓу кои 14 деца, соопшти украинското Министерство за внатрешни работи.
Украинските власти ги обвинија руските сили дека гаѓаат цивилна инфраструктура, вклучувајќи станбени згради и училишта.
Конашенков, исто така, ја обвини украинската влада дека го користи народот на Киев како „човечки штит“, повторувајќи го тврдењето дека украинските „националисти“ распоредиле артилерија во станбените области на главниот град.
Си-Ен-Ен пишува дека нивните тимови на теренот во Киев „виделе од прва рака украински цивилни доброволци – дури и членови на парламентот – како земаат оружје и се подготвуваат да го одбранат главниот град“.