Во руските ракетни и беспилотни напади во Украина беа повредени 11 лица во текот на ноќта и оставија голем дел од земјата без струја, соопштија властите во четвртокот.
Во југоисточниот дел на Запорожје, шефот на регионалната воена администрација изјави дека Русија го бомбардирала градот со проектили, кои погодиле станбени згради.
– Бројот на ранети во непријателскиот напад на Запорожје се зголеми на 11 – изјави Иван Федоров на Телеграм.
– Меѓу ранетите има и шест деца – три девојчиња и три момчиња. Децата се на возраст од три до шест години – додаде тој.
Украинската министерка за енергетика Свитлана Гринчук изјави дека „Русија повторно започнува масовен ракетен и беспилотен напад врз енергетската инфраструктура на Украина“.
– Што е можно поскоро, спасувачите, екипите за поправка и енергетските експерти ќе почнат да ги отстрануваат последиците од нападот, да ја обноват електричната енергија и да ја проценат штетата – наведе таа на Фејсбук.
Во повеќето украински региони поради нападот беа воведени итни прекини на снабдувањето со електрична енергија, соопшти државниот оператор на електричната мрежа Укренерго.
Руското Министерство за одбрана соопшти дека во текот на ноќта соборило 170 украински беспилотни летала, од кои 48 во областа Брјанск, која граничи со Украина, и девет во регионот на Москва, од кои шест се движеле кон главниот град.
Русија одржува речиси постојан налет од беспилотни летала и ракетни напади – особено врз енергетските мрежи на Украина – додека ја продолжува инвазијата од големи размери што ја започна во февруари 2022 година.
Украина се повеќе одговара со свои напади насочени кон руските нафтени рафинерии и друга енергетска инфраструктура.
Американскиот претседател Доналд Трамп се обидува да обезбеди договор откако се врати во Белата куќа во јануари, но разговорите не постигнаа голем напредок, пренесува АФП.