Московскиот суд денеска му го продолжи притворот за два месеци, до 30 јануари, на американскиот новинар Еван Гершкович, кој на крајот на март беше уапсен во Русија и обвинет за шпионажа, што тој го негира.
„Притворот на Еван Гершкович е продолжен за два месеца, до 30 јануари 2024 година“, се вели во соопштението на судот.
На новинарите не им беше дозволено да присуствуваат на сослушувањето на Еван Гершкович, кое се одржа зад затворени врати.
Само неколку новинари се собраа пред влезот на судот и покрај студот, јави дописникот на АФП од лице место.
Продолжувањето беше сигурно, бидејќи руското правосудство многу ретко ослободува луѓе од притвор во очекување на судење за такви сериозни обвиненија.
Геркович (32), новинар на американскиот Wall Street Journal, беше уапсен на 29 март во Екатеринбург, на Урал.
Оттогаш, тој е задржан во московскиот затвор Лефортово, кој го користи Руската служба за безбедност (ФСБ) за да ги држи затворениците во речиси целосна изолација.
Геркович, кој претходно работеше за АФП во Москва, беше обвинет за шпионажа, кривично дело казниво до 20 години затвор.
Новинарот ги отфрла тие обвинувања, како и официјален Вашингтон и весникот за кој работи.
Русија никогаш не ги потврдила своите обвинувања ниту јавно презентирала докази, а целиот процес е класифициран како таен. Засега не е одреден датум за судење.
Неговото апсење се случи во време на сериозни дипломатски тензии меѓу САД и Русија поради конфликтот во Украина.
Вашингтон воено и финансиски го поддржува Киев против Москва.