Русија може да испорача до Иран до 55 милијарди кубни метри гас годишно, изјави рускиот претседател Владимир Путин.
Тој го објави ова во време кога Москва се обидува да го диверзифицира протокот на гас по драматичниот пад на извозот на гас во Европа, објави Ројтерс.
Од почетокот на војната во Украина во 2022 година, Русија ја загуби својата доминација на европскиот пазар на гас, што некогаш беше клучен извор на приходи за руската државна компанија Газпром.
Владимир Путин, на заедничката прес-конференција со неговиот ирански колега Масуд Пезешкијан, рече дека испораката на руски гас за Иран треба да започне со мали количини, до две милијарди кубни метри.
Количината од 55 милијарди кубни метри би била слична на онаа во подморските гасоводи „Северен тек“, кои минуваат до Европа преку Балтичкото Море и беа оштетени во експлозии во 2022 година, наведува Ројтерс.
Минатиот јуни, Гаспром потпиша меморандум со Националната иранска гасна компанија за снабдување на Иран со руска енергија од гасовод.
И покрај тоа што има втори по големина резерви на гас во светот, по Русија, Иран увезува гас, вклучително и од Туркменистан, поради неможноста да инвестира во таа област, што делумно е предизвикано од американските санкции.
Иранскиот министер за нафта Џавад Оџи минатиот јули изјави дека Иран ќе добива 300 милиони кубни метри руски гас дневно, или околу 110 милијарди кубни метри годишно.