Русија е поврзана со 110 акти на саботажа и криминални активности во Европа од 2022 година, вклучувајќи палење, саботажа, напади, па дури и обиди за атентат, според новиот извештај на Глобалниот безбедносен форум GLOBSEC и Меѓународниот центар за борба против тероризмот (ICTC).
Заедничкото истражување покажа дека ваквите операции најчесто се регистрирани во Франција и Полска, дека 89 од вкупниот број биле успешни и дека врвот бил во првата половина на 2024 година, кога биле пријавени масовни палежи во Полска и Литванија, а експлозивни пакети биле откриени во магацини на логистички компании.
Според GLOBSEC, извештајот открива како Русија изградила врска помеѓу криминалот и тероризмот преку експлоатација на криминалци за да ја поттикне својата хибридна војна против Европа и покажува дека хибридните операции се централен столб на руската стратегија.
Како што ИСИС некогаш регрутираше европски криминалци во своите редови, Русија сега обучува социјално маргинализирани лица, честопати мажи што зборуваат руски јазик со претходни пресуди, за да извршуваат саботажи, палење и други напади на европско тло.
Овој пат, сепак, не станува збор за терористичка организација, туку за државен актер кој врши регрутирање и операции, според извештајот „Руската врска помеѓу криминалот и теророт: Криминалот како средство за хибридно војување во Европа“.
Исто така, се наведува дека темпото на ваквите операции се забрзало по протерувањето на повеќе од 600 руски оперативци од Европа од 2018 година.
„Лишана од своите разузнавачки службеници под дипломатска заштита, Москва се сврте кон европското подземје, оставајќи ја саботажата на „еднократните“ цивилни агенти“, се оценува во студијата.
Понатаму се наведува дека 131 лице е идентификувано како учесници во 110 инциденти поврзани со Русија, од кои најмалку 35 со криминално минато биле регрутирани во затвори или преку групи на организиран криминал.
Типичен регрут е маж во триесеттите години, често од постсоветска држава, кој зборува руски и живее во несигурни економски услови.
Исто така, се наведува дека регрутирањето често се врши преку платформи како Телеграм, но и преку роднини и пријатели.
Вака се создадени мали, отпорни мрежи кои работат локално, иако понекогаш ги преминуваат границите за да се сокријат.
Кога станува збор за финансиски придобивки, плаќањата се движат од неколку евра за пишување графити до значителни суми за обиди за напади врз критична инфраструктура.
„Клучно е извештајот да истакне дека хибридните операции на Русија се неразделни од нелегалното финансирање и избегнувањето санкции“, се вели во соопштението, додавајќи дека Москва се свртела кон тајни финансиски операции за да префрла пари преку границата, да им плаќа на оперативците и да ја одржува својата воена економија.
Се заклучува дека ваквите канали му овозможуваат на Кремљ да ги заобиколи ограничувањата и во исто време да ги вгради криминалните мрежи подлабоко во своето хибридно војување.
Авторите на извештајот веруваат дека руските операции треба да се гледаат и како казна за европската поддршка за Украина, и како подготовка за потенцијален поширок конфликт.
Во исто време, тие повикуваат на пошироко разбирање на хибридните закани и подобра соработка меѓу јавните и приватните актери, како и поголеми инвестиции во капацитетите за внатрешна безбедност на Европа.