Руските пратеници го направија првиот чекор кон одобрување два нацрт-закони кои ќе и дозволат на владата да ги принуди компаниите да ја снабдуваат војската со стоки, а нивните вработени да работат прекувремено за да ја поддржат руската инвазија на Украина.
Таа иницијатива дојде по повеќе од четири месеци од она што Русите го нарекуваат „специјална воена операција“, која ги поттикна западните земји да воведат бран санкции против Москва.
Еден предлог-закон – одобрен во прво читање од Државната дума, долниот дом на парламентот – предвидува дека државата може да воведе „посебни економски мерки“ за време на воените операции и да бара компаниите да ја снабдуваат војската со стоки и услуги на барање на руската влада. .
Во образложението на предлог-законот се наведува дека на армијата и се потребни нови материјали и поправка на оружје за да ја продолжи кампањата во Украина.
„Потребата навремено да ги исполниме тие барања, особено во поглед на санкциите против Русија и руските правни лица, бара од нас привремено да се фокусираме на одредени сектори на економијата (…) и да организираме снабдување со ресурси преку набавки за државните одбранбени цели“, се наведува во образложението.
Владата ќе го регулира и работното време на годишно ниво во некои компании
Друг предлог-закон, исто така прифатен во прво читање, ќе го измени Законот за работни односи за да и се даде на Владата право да го регулира работното време и да одредува слободни денови во одредени компании.
Тоа би значело дека владата би можела да ги принуди вработените во компаниите кои ја снабдуваат војската со стоки да работат ноќе, викенди и празници и без годишен одмор.
Предлозите на двата закони руската влада ги достави до Државната дума.
Сè уште треба да го поминат второто и третото читање, а треба да бидат разгледани од горниот дом на парламентот и потпишани од претседателот Владимир Путин за да станат закони.