Американскиот државен секретар Марко Рубио денеска изјави дека Вашингтон подобро ги разбира условите под кои Москва би била спремна да ја заврши војната во Украина, откако специјалниот американски пратеник Стив Виткоф се сретна со рускиот претседател Владимир Путин.
„За прв пат од почетокот на оваа администрација, имаме конкретни примери за тоа што Русија би се обидела да ја заврши војната. Клучните елементи за завршување на војната ќе бидат териториите“, рече Рубио, според Ројтерс.
Тој рече дека американскиот претседател Доналд Трамп и Путин можеби ќе разговараат по телефон во следните два дена, но не знае дали двајцата всушност ќе се сретнат следната недела, бидејќи зависи од тоа колку напредок ќе постигнат двете страни.
„Денес беше добар ден, но сè уште имаме многу работа, многу пречки да ги надминеме“, рече Рубио.
Кога станува збор за потенцијалното воведување на следниот пакет американски санкции против Русија, тој рече дека Трамп ќе донесе одлука за тоа во следните „ден или два“.
„Сè уште не сме во фазата кога Трамп ќе донесе одлука за тоа“, рече Рубио.
Претходно, Ројтерс објави, повикувајќи се на неименуван функционер од Белата куќа, дека средбата меѓу Путин и Трамп би можела да се случи уште следната недела, но дека локацијата на потенцијалната средба сè уште не е утврдена.
Функционерот изјави дека руската страна изразила интерес за средба со Трамп, како и дека Трамп е отворен за идејата за трилатерална средба со Путин и украинскиот претседател Володимир Зеленски.
Претходно, „Њујорк тајмс“ објави дека Трамп планира да се сретне со Путин уште следната недела.
Изворот рече дека потоа, Трамп треба да се сретне со украинскиот претседател Володимир Зеленски и дека европските лидери кои учествуваа во телефонскиот разговор меѓу Трамп и Зеленски биле свесни за ова.
Трамп претходно денес објави дека неговиот специјален пратеник Стив Виткоф постигнал голем напредок во денешните преговори со рускиот претседател Владимир Путин во Москва.
На својот профил на мрежата Truth Social, тој изјави дека ги информирал одредени европски сојузници за резултатите од разговорите меѓу Виткоф и Путин во Москва и дека се согласува со сите дека војната во Украина мора да заврши.
Виткоф се сретна со рускиот претседател Владимир Путин порано денес во Москва, а помошникот на Путин, Јуриј Ушаков, рече дека на состанокот биле разгледани украинската криза и перспективите за можен развој на стратешка соработка меѓу САД и Русија.
Средбата, како што изјави Ушаков, била многу корисна и конструктивна.