Зголемувањето на американските поморски сили во областа околу Јужен Кариби ги натера официјалните лица во Венецуела и експертите во САД да се запрашаат дали целта е борба против нарко-картелите, како што предложи администрацијата на претседателот Доналд Трамп, или нешто сосема друго, според Ројтерс.
Вкупно седум американски воени бродови, како и една нуклеарна подморница, со над 4.500 морнари и маринци се распоредени во тој регион, или се очекува наскоро да бидат распоредени, известува агенцијата.
Американските претставници изјавија за Ројтерс дека целта на војската е да се спротивстави на заканата што ја претставуваат нарко-картелите.
Заменик-началникот на кабинетот на Белата куќа, Стивен Милер, денес изјави дека целта на зголемувањето на силите е „борбата против организациите за трговија со дрога, криминалните картели и странските терористички организации на нашата хемисфера“.
Сепак, според Ројтерс, не е сосема јасно како американското воено присуство ќе ја спречи трговијата со дрога, бидејќи поголемиот дел од неа се одвива по море преку Пацификот, а не преку Атлантикот, каде што се распоредени американските сили, а голем дел од дрогата што пристигнува во САД преку Карибите доаѓа преку тајни авионски летови.
Венецуелските власти веруваат дека вистинската цел би можела да биде нивната влада.
На почетокот на август, САД ја удвоија на 50 милиони долари наградата за информации што би помогнале во апсењето на претседателот Николас Мадуро, кој е обвинет за трговија со дрога и врски со криминални групи, потсети агенцијата.
Министерот за внатрешни работи Диосдадо Кабело и амбасадорот на Венецуела во ОН, Самуел Монкада, изјавија дека САД ѝ се закануваат на нивната земја со распоредување на морнарицата, што е кршење на меѓународните договори.
Тие, исто така, ги отфрлија тврдењата на САД дека нивната земја и раководството играат клучна улога во меѓународната трговија со дрога.
„Венецуелскиот народ знае кој стои зад тие американски воени закани кон нашата земја. Ние не сме дилери на дрога, туку чесни и вредни луѓе“, рече министерот за одбрана Владимир Падрино, без да даде други детали.
Администрацијата на Трамп навести дека може да ја употреби војската за борба против нарко-картелите и криминалните банди и му нареди на Пентагон да подготви опции.
Државниот секретар на САД, Марко Рубио, денес отпатува во Дорал, Флорида, за да го посети седиштето на Јужната команда на американската војска, која ги надгледува операциите во регионот.
На прашањето дали Белата куќа ја исклучува можноста за промена на режимот во Венецуела, неименуван висок функционер на администрацијата рече дека американските сили сега се таму за да се осигурат дека нема да се случи трговија со дрога.
Американските претставници истакнуваат дека, иако има значителни сили во регионот, тие се уште се премногу мали за да спроведат операција од типот на која предупреди Каракас, пренесува Танјуг.