Високи републикански претставници на Конгресот побараа од американските безбедносни агенции да започнат поефективно да се спротивстават на заканите од терористичките организации како што се Исламската држава и Ал Каеда под новиот американски претседател Доналд Трамп, соопшти Комитетот за домашна безбедност на Претставничкиот дом.
Проценката на заканата објавена од Комитетот за домашна безбедност го нагласува новогодишниот напад во Њу Орлеанс во кој загинаа 14 лица, како и апсењето на осум државјани на Таџикистан во јуни 2024 година, осомничени дека се поврзани со Исламската држава, објави Гласот на Америка.
„Црвеното предупредувачко светло е вклучено“.
Терористичкиот напад во Њу Орлеанс е остар потсетник дека терористичките закани се присутни во Америка.
„Странските терористички организации и џихадистичките мрежи во странство се посветени на регрутирање и радикализирање на поединци на американско тло“, изјави претседателот на републиканскиот комитет Марк Грин, пренесува Танјуг.
Грин ја обвини за зголемувањето на терористичките закани администрацијата на поранешниот претседател Џо Бајден.
„Терористичките групи беа охрабрени од грешките во националната безбедност во последните четири години“, посочи тој.
Документот, насловен „Преглед на терористички закани“, наведува повеќе од педесет случаи на тероризам во триесет американски држави од април 2021 година, а исто така евидентира 187 апсења, напади и заговори поврзани со тероризам во Западна Европа од почетокот на 2023 година.
Федералното биро за истраги потврди за Гласот на Америка дека ФБИ е сè позагрижено поради можноста од координирани терористички напади врз САД.
„Ние постојано укажувавме во последните години дека САД се наоѓаат во средина на засилени закани.
„Тоа го покажа нападот на новогодишната ноќ во Њу Орлеанс“, соопшти ФБИ.
Проценката за 2025 година на Секретаријатот за домашна безбедност, објавена во 2024 година, содржеше слични предупредувања.
„САД ќе бидат во средина на зголемен ризик од тероризам до 2025 година“, се наведува во документот, нагласувајќи дека најголемата опасност доаѓа од поединци кои можеби не се поврзани со терористички организации и групи.